Manipuli ren ni degun (e podètz parlar de çò de "l'Anchluss dau lengadocian centrau", s'aquò vos interèssa; a ieu e a la rèsta dei gents, m'estonariá, e en mai d'aquò siáu pas ieu que ne'n parlèri bèu promier). Grandmercé doncas d'aver clarificat vòstra posicion, que me sembla pasmens luenha de vòstreis amics dau Collectiu Provença que s'acontentan pas d'aver de reaccions allergicas au mot "occitan" mai negan, elei, l'unitat de la lenga, e mai son existéncia !

Lo problèma es pas la lenga francesa en se : es l'impossibilitat d'aver pron d'espacis societaus per parlar l'occitan, lo provençau, lo cevenòu, coma voudretz... Mentre que lo Collectiu Provença e seis amics vòlon mobilizar "còntra l'occitan", coma s'èra una manòbra imperialista dau poderós Comtat de Tolosa reviscolat, l'arquidominacion de la lenga francesa dins la societa occitana (levat Aran e lei Valadas occitanas, evidentament)deven una question segondària...

#229: DanièlOlivar -

Su tout ço que disès me sente d'acòrdi, e hou devès saupre: aici represente pa que ieu, e ni LOU CLU nimai lou Couleitiéu nimai l'Alianço: eles an pa juja interessant de dialouga embé vautres, es lus biais de veire la causo, es pa lou miu.

Sièi pa aici per assaja de fa trioumfa mas idèio, mè per saupre ço que pensas vautres, e coussi nous vesès: coumo d'enemi que fòu coumbatre fort e mort, coumo de countestatàri que pàusou de proublemo que sou pa que de proublemo de l'oucitanisme, mè de la militancio per las lengo regiounalo ? Coumo d'aligat poussible (mè alaro foudriè pa acoumença per lous insoulenta din un Manifesto per l'unita, hou dise un cop de mai)... De-segu que li a aici un proublemo per vautres, e ges per lous prouvençalisto "pu e du", que d'efié vous vésou coumo d'enemi, pa mai e pa mens. Li a uno radicalita en Prouvenço que belèu lous que soun pa de militant prouvençau pòdou pa coumprene (mè vous que sès un Prouvençau, hou devès senti)

Coussi esplica aquesto asiranço ? Siègue qu'es lou Couleitiéu un troupèl (ou troupelou: "gropuscul!) de marit-pèu que pénsou pa que d'abausouna tout ço qu'avès basti: es uno versiu qu'avès belèu un pau trop tendencio de creire, per facilita, qu'es mai aisit de "coumbatre" un enemi ferouge que noun pa un simple countrastaire...

Siègue aquesto gent, à tort ou rasou, se sentissou (ou se soun senti) agari per l'oucitanisme, e aro se mesfisou de vautres coumo de la pesto...

Ieu à l'ouro d'aro ai de relaciu "nourmalo" embé lou mounde oucitanisto Cas ceveno, mè à la debuto m'a fougu bataia cronto eles: voulièu fa un "Couletiu Gard" qu'avièu bateja "Couletiu Oucitan"; lus faguère aremarca que lou mot èro pa un terme d'unita, que lou foudriè remplaça per "lengo d'o" ou "d'o"; e que lus escrituro oucitano seriè pa acetado per lous felibre, que foudriè aceta LA DOUBLO GRAFIO, l'oucitano E la mistralenco. Dequ'avièi pa fa! La responso seguè sens replico: countugnaren d'emplega lou mot "oucitan" e nosto grafio !... (de tout acò, das doucumen de la poulemico faguère un librihou que se po legi)

Poudès pensa coumo aquesto voulounta d'"unifica" lous aparaire de la lengo d'o seguè acuhido din lou mounde mistralen! Fin finalo, aqueste "Couleitiu" FAGUE UNO CAGADO COMPLETO, n'avèn pu jamai ausi parla ! Vejaici ço que se gagno à se fa d'enemi embé de mounde de bono voulounta coumo ieu e, à l'epoco, la qu'es vengudo la presidento dau CLU (un e l'autro oucitanisto qu'erian à l'epoco, aremarcas).

Emb'uno esperiencio coumo aquesto, poudès juja se de legi un Manifesto que presico per l'unita e fa per un oucitanisto, aguère lèu touto fisanço ! Vai be qu'à l'evidencio JF Brun es un ome ounèste, mè demoro lou sentimen que l'oucitanisme, quouro se crei lou mai fort, es d'uno croio qu'es pa de creire... Avèn aprés à nous apara, en cas de dangiè...

Vaqui, me semblo que tant que li aura pa agu, de vosto part, uno reflessiu toutalo su lou bilan de l'oucitanisme d'aquesto pountannado (desempièi las annado 60, per fa court), li aura pa d'avançado poussiblo per l'unita.